ايجابية و سلبيةالشباب

السلام عليكم

ايه المواضيع الجامدة دى يا نرمين ايجابية الشباب فى المجتمع , سبحان الله على قد كل الفساد اللى ملى البلد و حالنا اللى كل يوم من سئ الى أسوأ و وصولنا لدرجة من تدهور الاوضاع و فساد القيم مبقاش ينفع معاها اننا نسكت أكتر من كده , مينفعش نفضل عايشين كده على طول فى صراع من أجل البقاء بمعنى البحث عن لقمة العيش و خلينى ماشى جنب الحيط علشان أعيش لأنك ببساطة برضه مش حتعيش و حتلاقى الحيطة بتقع على دماغك ,خلاص البلد مبقاش فيها حاجة ممكن تتطمنلها , الأوضاع تفاقمت و الميزان اختل و اصبحنا نعيش فى فضاء غريب لا أستطيع حتى أن أطلق عليه غابة لأن الغابة على الأقل تحكمها قوانين تحترمها الكائنات التى تعيش فيها(الحيوانات)لكننا نعيش فى مكان الشئ الوحيد الذى يحكمه قانون البقاء للفاسد و اللى غير كدةملوش مكان فى تلك المنظومة

لطالما حيينا و تربينا و نحن نسمع عن كلمات القيم و المبادئ و نصرة الحق و أن الخير دوما ما ينتصر و يقهر الباطل و لكن كبرنا الآن و أصبحنا نفهم و نرى ان كل تلك القيم و المفاهيم ليست موجودة و كأنها انتزعت من منظومة الحياه و أصبحت مجرد كلمات تسطر فى صفحات الكتب وجلسنا نعيب الزمان و نلعن المكان (مصر) و ما للزمان و لا المكان عيب سوانا !!! عارفين ليه الحق مش موجود؟؟ لأن أصلا محدش بيدور عليه.. ليه الفساد توغل؟ لأن ملقاش اللى يوقفه عمرك شفت حرامى فى الدنيا ميسرقش بيت أصحابه فتحينه و سرقهم و هما شايفينه طب ايه اللى يخليه ميسرقهمش تانى؟؟ ده لو معملهاش يبقى غلطان... مشكلة مصر مش فى مصر و لا فى اللى بيفسدوا فيها و لكن فى اللى ساكتين على الفساد ده أنا معاكوا ان بجد فيه ناس بتحاول تصلح و و كان قداامنا تجربة عملية فى الكلية لمجموعة استفتاء اللى كانت عايزة تصلح حلقة صغيرة من دايرة الفساد الكبيرة و طبعا لاقوا مشاكل و فى الآخر مقدروش يصلحوه بس الناس دى حاولت تعمل حاجة تقدر تقابل بيها ربنا و تقول يا رب أنا حاولت و متقدرش تقول ان الفساد انتصر لأن لسة و انا واثقة ان فيه جولات تانية و فيه ناس حتتعلم منهم و يكملوا اللى بدؤوه و ممكن برضوه مينجحوش بس حيكملوا تانى و تالت و مليون و حينجحوا فى الآخر عارفين ليه ؟؟؟؟لأن الله تعالى قال فى كتابه"كذلك نقذف بالحق على الباطل فيدمغه " الحق حينتصر بس يلاقى اللى يؤمن بيه يلاقى اللى يدور عليه و ينصره و يكون عارف انه حيحارب من أجله وانه حتيتعب قى من أجل نصرته و ده شئ طبيعى أوليس من أجل هذا خلقنا من الأصل نكون خلفاء الله فى الأرض و ننصر الحق

انا مرة كنت بشوف برنامج مستضيف أطفال مكفوفين فالمذيعة سئلت واحد فيهم و قالتله انته مش زعلان انك عايش على طول فى الظلام ؟ فرد عليها و قال يعنى ايه ظلام؟ قالتله مش فاهمة قصدك قالها يعنى اللى يعرف الظلام لازم يكون شاف النور انا مشوفتوش فمعرفش معنى الظلام ....اقصد من الحكاية دى ان من رحمة ربنا فى الكون انه خلق الشئ و نقيضه و ده علشان تفهم معانيها يعنى لازم يكون فيه باطل علشان تعرف الحق و لازم يكون فيه فساد علشان حضرتك تصلحه امال يعنى مخلوق فى الأرض تعمل ايه؟ !!!!و سبحان الله شوفوا عجيب شان الله فى خلقه كان لازم تكون سلبى علشان تتعلم ازاى تكون ايجابى و انا شايفه ان ده اللى بيحصل حاليا الناس ابتدت تفوق و عايزين يعملوا حاجة و بالفعل بدؤا و بيصلحوا و و فى امثلة قريبة مننا أحب اشيد بمعيدين اعدادى بجد بينتهجوا معاهم سياسة تعليمية قائمة على تنمية قدراتهم على الابداع و تكوين الرأى و الشخصية بيحاولوا على قد ميقدروا يصلحوا فى سياسة تعليم فاشلة والأمثلة كثيرة بس انا طولت قوى و شكل كدة محدش حقرا أساسا و ان حد قرا محدش حيعلق بس انا برضه حستنى ال comments

أنا بعت فى بوست جديد علشان بس يبقى ملفت ان فيه موضوع اتفتح و الموضوع كانت مقترحاه نرمين فى بوست قبلى